都昌方言小说 钻子头过年 [复制链接]

        桥头边只钻子头到屋里过年时心里兴纵得。在外头打得一年蛮工，风吹雨答，六月天里当昼在外头晒得身上黑汗水流，还掐死掐命，过清明寄得一千块钱到老婆，六月里双抢个时得又搭得一千多块钱到屋，腊月里到屋里过年，荷包里还舞得两万好几千块干净钱。
        钻子头今年算亨时，其只细母舅得在外头做个细细包工头得，包得一段路做，叫钻子头跟其帮靴，不光是出力做蛮工，还要帮靴打梗概，还要操点把心血得，管管工地上个东西，其只细母舅得也算好，一点都冒吃其只铜，才让钻子头舞得里个多钱。往年得钻子头跟别人打工，也一样个做蛮工，一样个风吹雨答，一样个掐死掐命，能舞到个么一万四五千块干净钱得到屋就嘶笑个。
        腊月十几里到屋，笑面得冒挂几日，钻子头得就笑不起来，越过越起瘟火。在屋场四到里走走，走得心里瘟火得崩，在自己屋里坐，也是坐得心里火星得爆。看到么得都不顺眼，肚里有火还谬哪里出处，就寻老波柳花得个搬头。柳花得也可怜，辛辛苦苦天光忙到夜，还要跟钻子头打干瘪鼓。
        钻子头心里难过，是想到自己两只化生子崽俚，想到自己夫妻两个在崽俚头上花得许多心血得，都送得读大学，还不如别人冒送读书个崽。
        虽说钻子头拿得许多个钱到屋，还有屋里柳花得田地里猪栏里也舞得四五千块钱，加起来两万多，可钻子头到屋冒过几日，跟头就冒盈只卵。送崽俚读书借得许多个钱，里个三千嗯个两千还得别个，东一散西一散就谬得，也就是少打些逼供得，省得别人腊月三十还跑得屋里来讨债。
        里都不说，欠人家个钱总要还。
        钻子头肚里起瘟火，心里火星得爆，为的两只不成器个化生子崽，到现在还冒到屋里过年，不光人冒来，电话也冒打一只来。
        里都是自己烂卵，晓得刊两只里个鬼东西，当初还不如屙到尿桶里去。看到别人个崽带老婆来过年，开车来过年，钻子头气得骂自己，骂柳花得。

2

腊月二十三，钻子头在床上困到朝饭过后，才等别人叫得起来。侧边屋场上老得一只老倌，老倌位下人来请钻子头打课书，看封殓个时辰跟出殡个日子。

钻子头读得个书得，也叫做假演得个高中毕业。其读书个时得碰得文化大革命，读书叫做开门办学，不是跟着学里个表演队半夜三更到学堂侧边上屋场上唱歌得，就是跟一到老师论只礼拜到广阔天地搞大有作为。

好多人跟钻子头样个高中毕业是白读得，读来读去也就是认得几点死眼钟字，一些用处得都冒有。钻子头不同，其只书冒白读，反正其是从来不做谬用个事。也表得其是从惹里只那角里寻得许多个里样个嗯样个鬼书，看看书得就跟别人看日子、打课书、打时、看地。嘿嫑说嘞，钻子头里样个三十三天得个扮，一年到头也可舞得好多个鬼东西。其不在屋里就算定，其在屋里个日子，么卵简级烟得得嫑钱买长期有个得手里飘，简级酒得嫑钱打间往得有个得口里滋，碰到做屋拜堂个看日子还要拎个肉得过来，闲往得不说，过年个肉钻子头都不买，就是别人拎来个二三十斤肉得过只勒实年。

给别人打了课书，人家拿得六十块钱到其。现个人都醋爽，就是光拿个钱得，拿个人省得拎拎掸掸拎只篮，得个人拿得钱愿买么得买么得，都对扭。钻子头到屋里十多日得，就看得十几只日子，舞得差不多上千块钱。

其实，像过年个时得，钻子头还真望别人拎个肉得烟得酒得来，省得花钱斫肉买烟打酒。虽说别人拿个钱斫肉也是一样个，但叫钻子头拿荷包里个钱去斫肉吃还真舍不得。

过年又不能不吃肉。钻子头张望别人拿来个肉过年，惹晓得腊月二十三都冒舞到一钱肉，过年个肉表得惹里望天不说，到屋里许多时，钻子头还冒吃过一块肉，日日萝卜青菜，餐餐青菜萝卜，肚里都跟上得锈样个。

看好得日子，送得别人出门，钻子头就到灶屋里寻粥吃。粥煮好得在锅里，钻子头盛得一碗粥、四只糯米过年粑坐得灶跟吃。柳花得煮好得粥就到坂里扯萝卜去得。

日日萝卜，日日萝卜，钻子头吃洋得，想寻个别么事菜渗粥。别么得也谬个寻，就是霉豆腐辣椒酱。还真是撞得好，一坛霉豆腐正好吃了得，柳花得把只霉菌豆腐坛浸得泔水里。

钻子头晓得，霉豆腐是昨日吃了得，但霉豆腐坛里还有好多霉豆腐水，拿到钻子头本来还可渗得好几日粥，惹晓得柳花得连霉豆腐水一套丢得泔水里。

“里只打八败个女卵。”钻子头气得骂柳花得。

柳花得恰好嘿着叭着跳得一担萝卜到屋，听到钻子头骂其，也不输火账：“么人打八败，打打工得到屋里就表得几大个功样个，屋里个事你菩萨不劳卵神，表得跟几大个官样个摆档，煮得嗯吃还要说里个说嗯个，我打比是一年戏到头比哟，嗯还是跟到我老弟做个呆事得，我屋里坂里坂里屋里，什么事都是自打鼓自划船。”

柳花得说得眼泪都渀得出来的。

等待下集。。。。

    花了好大的心血。倒是首创。多数字很准确。有些似无必要。如不晓得没有必要说成表得。挑无需说成跳，倒不是无需说成打比，不是啊无需说成比哟。没有无需说成谬，用冇倒是可以。经纪无需说成简级，哪无需说成惹。女人不要说成女卵。泔水不是都昌话，都昌话说潲水或溲水。雨嗒不是雨答。打八败却不知是什么。特色文化。图爽，引号就冇用哈。
    本文不用太多的方言来写倒是易读，当是一篇极好的小说。建议啦。

       真实的反应都昌农村人的生活，很有家乡的韵味！我怎么感觉像是在说我老爸老妈呢！哈哈哈.......也许是广泛意义上的认同感吧！不管别的，有这种感觉......就非常好！

引用第3楼雪夜彭城于2011-03-19 21:06发表的 :
    花了好大的心血。倒是首创。多数字很准确。有些似无必要。如不晓得没有必要说成表得。挑无需说成跳，倒不是无需说成打比，不是啊无需说成比哟。没有无需说成谬，用冇倒是可以。经纪无需说成简级，哪无需说成惹。女人不要说成女卵。泔水不是都昌话，都昌话说潲水或溲水。雨嗒不是雨答。打八败却不知是什么。特色文化。图爽，引号就冇用哈。
    本文不用太多的方言来写倒是易读，当是一篇极好的小说。建议啦。

           雪夜彭城兄：““里只打八败个女卵”的意思是：“一个这样败家的女人”！方言还可以说成是：“一咋里个喇不败个女卵”！

比文言文还难读******

花了我个把小时，眼晴都有点疼了。

徐兄用心了！

用户被禁言,该主题自动屏蔽!