都昌方言小说钻子头过年|【九里湖丨徐红生】文集 - 都昌在线，都昌人自己的网上社区

九里湖

论坛版主

发帖: 1087

积分: 14960

贡献值: 126

都币: 2

在线时长： 385小时

注册时间： 2008-12-06

我的老家: 县城(都昌镇)

只看楼主正序阅读使用道具楼主发表于: 2011-03-19

— 本帖被都市牧羊人设置为精华(2011-03-20) —

1

        桥头边只钻子头到屋里过年时心里兴纵得。在外头打得一年蛮工，风吹雨答，六月天里当昼在外头晒得身上黑汗水流，还掐死掐命，过清明寄得一千块钱到老婆，六月里双抢个时得又搭得一千多块钱到屋，腊月里到屋里过年，荷包里还舞得两万好几千块干净钱。
        钻子头今年算亨时，其只细母舅得在外头做个细细包工头得，包得一段路做，叫钻子头跟其帮靴，不光是出力做蛮工，还要帮靴打梗概，还要操点把心血得，管管工地上个东西，其只细母舅得也算好，一点都冒吃其只铜，才让钻子头舞得里个多钱。往年得钻子头跟别人打工，也一样个做蛮工，一样个风吹雨答，一样个掐死掐命，能舞到个么一万四五千块干净钱得到屋就嘶笑个。
        腊月十几里到屋，笑面得冒挂几日，钻子头得就笑不起来，越过越起瘟火。在屋场四到里走走，走得心里瘟火得崩，在自己屋里坐，也是坐得心里火星得爆。看到么得都不顺眼，肚里有火还谬哪里出处，就寻老波柳花得个搬头。柳花得也可怜，辛辛苦苦天光忙到夜，还要跟钻子头打干瘪鼓。
        钻子头心里难过，是想到自己两只化生子崽俚，想到自己夫妻两个在崽俚头上花得许多心血得，都送得读大学，还不如别人冒送读书个崽。
        虽说钻子头拿得许多个钱到屋，还有屋里柳花得田地里猪栏里也舞得四五千块钱，加起来两万多，可钻子头到屋冒过几日，跟头就冒盈只卵。送崽俚读书借得许多个钱，里个三千嗯个两千还得别个，东一散西一散就谬得，也就是少打些逼供得，省得别人腊月三十还跑得屋里来讨债。
        里都不说，欠人家个钱总要还。
        钻子头肚里起瘟火，心里火星得爆，为的两只不成器个化生子崽，到现在还冒到屋里过年，不光人冒来，电话也冒打一只来。
        里都是自己烂卵，晓得刊两只里个鬼东西，当初还不如屙到尿桶里去。看到别人个崽带老婆来过年，开车来过年，钻子头气得骂自己，骂柳花得。

[ 此帖被九里湖在2011-03-20 15:36重新编辑 ]