都昌方言小说 钻子头过年 [复制链接]

要是有个人朗读的话 那就顺目了。

期待下一集·····

好文章  在外地看家乡的文字就像置身其中

钻子头过年谬哇首，耶侬又是咂舞瓜的命……

4
昼饭不再是青菜萝卜，柳花得煎得一碗霉豆腐水皮得，算是换得下口味。不过，钻子头还是吃得没有味。寡嘴老倌只二崽棒槌才十八岁，就说得老婆，还说正月里接新妇拜堂。自己只花鸡过得年就是二十八，油鸡也有二十五，两只个东西说老婆个事还谬影系得。钻子头也怪自己，前几年摆脸摆得尿得射，说两只崽郎个好郎个好，扮得现打总线个人都谬。
嗨，年总要过，年货再简级也要舞个得，总不能正月里亲戚来得吃筷子头。吃得昼饭，钻子头拿一张纸，把要买个年货计划得一下：海带一斤，盐两包，味精一包，香菇半斤，耳子二两，豆参一斤。墨鱼也要舞个得。钻子头记得正月里好像还盈得墨鱼，就问柳花得。
柳花得说还有一只，梅天里长得些空毛得，晒得好几番，还可吃得。
钻子头说，一只肯定不够，再买半斤凑，娘膣眼，里只墨鱼明朝炆肉吃。
钻子头又问柳花得要买渗茶个东西啵。
柳花得说嫑买，买个还谬自己舞个好吃。说屋里有花生，蚕豆，碗豆，晒得半蛇皮袋南瓜子，做得一坛薯角稣得。还八月里浸得一升糯米，过两日过个油果得、麻丸得。
在买几多肉上，钻子头打不定梗介。年年斫二十斤肉总有多，今年跟柳花得两个人过年，估计十斤肉就够得。当然，钻子头钻是钻，肚里梗介还是清。十斤肉，一下不警觉就不够，过年个时得掐狠得也难为情。钻子头就问柳花得。
柳花得说，过得年嗯上七边得出门十斤肉就够，要过得灯再走就多斫几斤。
钻子头狠狠心说，就斫十五斤。
钻子头卵摆卵摆摆到猴得店里，店里倚得好多人。寡嘴、猴得、芒子、大口、三矮子、瘌痢。几个人在说寡嘴说新妇个事。
寡嘴说：“凿得个老拐，棒槌里只化生子东西，好像爷卵不是肉长个，把我里把老骨头不上算，帮老婆要里个要嗯个。”
芒子说：“嗯是呃，现个崽俚都晓得花老婆，都榨老骨头。嫑说嗯两只崽，我一只个东西，也是一样个。把嗯当人不说，当骆驼。”
猴得问：“寡嘴你嫑在里摆脸，嗯说捞总用得几多钱？”
寡嘴说：“还冒咧，要接进门，怕是少不了七八万。”
瘌痢说：“七八万也叫多，嗯真是细人得冒见过大人个卵。我只新妇去得十五六万。”
三矮子说：“瘌痢嗯不算，嗯只新妇是街上人，十几万得算么得没。你只新妇娘屋里帮嗯只崽买得一套房子，说是要几十万哩。你去得十几万冒折本。”
瘌痢说：“我总去得嗯个多钱啥。”
猴得说：“瘌痢你有嗯个多钱？还不是你只崽个钱。”
瘌痢说：“我只崽个钱也是我个啥。”
钻子头光倚得嗯得听，唧声不做。
大口看到钻子头，问：“嗯两只崽俚来没。”
钻子头说：“嫑说，嫑说。”
猴得说：“钻子头你钻么得钻，嗯两只崽说新妇肯定嫑嗯问事，你就放二百四十个心，舞得个钱得就自己用，想吃就吃，想穿就穿。”
瘌痢说：“听我得崽俚说，花鸡在外头做老板哩。”
瘌痢说个是实话，钻子头听得却像是在笑其，就不想接到话说。其也不争，其晓得，争也争不赢，就问：“哪个屋里有肉么？我过年个肉还表得哪里要风。”
三矮子说：“呃，芒子不是四到里寻人卖肉嘎？”
芒子赶紧说：“谬，谬，谬，我屋里一只细细猪得，百若斤肉得，都约好得个。”芒子屋里有肉，只不过其不愿卖肉到钻子头。
里个多人在猴得店里，钻子头打算等下得再买年货，就出门去问肉。钻子头往猴得店后头屙得场尿回头，听到店里芒子说：“跟钻子头谬搞手，卖肉到其，转身说价钱高得，转身说肉不好，转身说称上吃得亏。”
听到里个话，钻子头起得火，恰好又看到杀猪老拎得杀猪家伙过来，想都冒想就把杀猪佬叫到屋里，也不等柳花得商量一下，从栏里牵得一只二百多斤个猪杀得。
看到一堆个肉，钻子头对自己说：我还谬肉吃！炒里吃，氽里吃，炆里吃。其实，杀猪佬把一放猪红出来，钻子头心里就把咯咯鼓，不晓得里个多肉卖得出去不。

都昌话说得好，写得妙，看的心里好舒服！

看完这篇文章真有好吃力。

苏山方言，是都昌方言，又有其特殊性，本人是苏山人因此读来觉得特别顺口（看到“打八败个”就晓得是么意思，但也只能意会，象前面二位苏山同乡解释个也不能代表它的全部意思，），特别有味。吗嗯只钻子头硬是写活得。真是难为嗯只徐老师。

5
到得腊月二十四，钻子头为自己杀猪个事硬是悔断得肠。
柳花得到屋看到钻子头杀得猪，还冒说个么得。一来是过年猪，不能搞经，二来十多年冒杀过过年猪，今年还清得账，也是欢喜事，杀猪过年也是应当个。
两百多斤个猪，杀得一百几十斤肉，嗯是二十三里个事，到二十四里断夜，钻子头屋里就是两百多斤肉。本来，钻子头打梗概是屋里留二三十斤肉得过年，盈得个都卖的。冒想到杀猪过后，问高得屋场上个人，就冒有一个说要肉。世个还真有鬼吃饼个事，断青、焦苗，钻子头到屋十几日冒吃肉个时得，谬只鬼送斤肉来，帮人看日子，人家都醋爽拿钱，嘿，等钻子头杀得猪，来看日子个就没有一只拿钱，都拿肉。光二十四里一日，看得六只拜堂个日子，舞得二十多斤肉。
屋里有肉别人送肉来，叫做狗屙屎沃芒草，屋里谬钱偏生出事来要用钱，就叫做皮寒单打虚鬼。
腊月二十四里上昼，来得三只送供奉礼篮得个，一只篮得八斤肉，又是二十多斤。看日子舞个肉得到管其，跟大水打来个差不多，供奉礼篮得就不好吃，要送礼。姐夫只女出嫁，大母舅得只女出嫁，姨夫只崽拜堂，做舅公做姑爷做姨爷，都不是一般得个简级礼得，没有几百拿不出手。里些个礼都是石头缝里蹦出来个礼，头下得星都冒听到星一下，算算拢一千块钱往外跑。要是早晓得有里些个礼，肉头上也是只眼色，现好，舞只里个大逼供打，跟头个钱送礼都不够，过年就只有光吃肉。
钻子头气得哼叫个。
二十五里上昼，钻子头吃得粥就灭得一朵棕叶得穿肉晾。打头想卖肉，钻子头就不穿肉晾，说是干得水分，卖人家称上吃亏，现谬办法，再不晾就要沤现。
半上昼，钻子头恰把肉穿完，门口走得一只人进来。
么人，花鸡，钻子头个大崽。花鸡就只背得一只细细包得，手上个么得冒拿，不跟别人样个大包小礼火一火二。钻子头想，花鸡又冒舞到钱。
花鸡不径不喜欢说话，进门叫都冒叫钻子头一声“爹爹”。
“嗯也晓得到屋里来耶，看一只嗯个黯相，读许多个书读得狗肚里去得。”钻子头冒等花鸡站稳就说。钻子头正气得难过，想在花鸡头上出气，把老实骂花鸡一餐，又舍不得。
花鸡走到桌得跟，把肩膀上个包取得下来打开，伸手就拿得一叠钱出来。
钻子头一眼就看出嗯是一万。
花鸡又伸手进包，又拿一叠出来，又是一万。
花鸡又伸手进包，又拿一叠出来，又是一万。
花鸡又伸手进包……
“等下得，等下得。”钻子头“呼”声一下站得起来，跳到大门口，“啪”声一下把大门关上闩紧。看到柳花得走到得门口，钻子头也冒等一下关门，生怕外头有过路个人看到花鸡拿钱出来。
“嗯关门做么得没？”柳花得恰在外头看到花鸡进屋，想看看崽，也怕钻子头骂崽，走快几脚到得大门口。看到钻子头关门，更心急，生怕钻子头拿花鸡出气。
“嗯走猪栏门里进。快些来，嗯快些来。”钻子头满心欢喜回过身看花鸡拿钱。
一叠又一叠，一万又一万，花鸡整整拿得二十万出来。
花鸡说，里二十万都拿屋里还账，还要做幢屋。花鸡说，明年下半年结婚，女朋友说喜欢乡下结婚个牌子，后年正月里来拜堂。
“可，可。好，好。”钻子头表得说个么得好。
钻子头看花鸡只包里好像还有钱，想去看看，又怕崽不欢喜。
“崽呀，嗯哪里舞许多个钱来？”柳花得看到桌上个钱，不是欢喜，而是担心，生怕花鸡是做得坏事舞来个钱。
花鸡说：“姆妈，你放心，里都是我个工资。”
钻子头问：“里个多工资？一年几多得啊？”
花鸡说其拿年薪，一年六十万。旧年加今年两年，一套是一百二十万。
“么得嘎！嗯个多！”钻子头跟柳花得都听得云端里去得，人都听孬得。
花鸡说，其读大学个时得谈得一只女朋友，女朋友个老子是大老板。女朋友要花鸡要其只老子个公司里做事，花鸡看大老板有些得看不起其，一径都不肯。花鸡研究得一只好产品，其总想自己开公司，一径谬钱开不成。女朋友个老子听说，晓得嗯是只赚钱个好东西，也就认为花鸡不是吸其只女，有本事，就让花鸡拿产品设计入得其公司只股。大老板反正也只一只女，就听得其只女个话，让花鸡做得总经理试试看，做得好就是年薪六十万，做得不好就光屁股走人。花鸡还真有本事，跟公司赚得好多个钱，大老板笑嘶得，干脆把公司交得花鸡跟女儿管，自己做快活神仙去得。里番到屋里来，公司里专门派得车送其到屋。
“车哩？郎个不开到前头坦上哩？前头个路都修好得，一径开进来。”钻子头问。
花鸡说：“送到后头大马路上，我就让司机走得，让其早些得到屋里过年。”
“一只里个哈巴，有车送也开过来让别人看看啥。”钻子头很惋惜。
花鸡看到肉就问：“屋里杀得猪哇？”
柳花得说：“嗯只老子，生怕谬肉过年。”
钻子头说：“肉多好过年，怕么得，明年开得正做屋，供匠人还省得买肉。”
钻子头话是哩样个说，心里还是想把肉卖的。现供师傅都要吃新鲜肉，腌肉吃多得师傅不欢喜。
柳花得问花鸡：“嗯也跟老弟打过电话没，老弟说来过年啵？”
花鸡说：“油鸡说其好忙，说不来过年。”
柳花得有些得不欢喜，说：“嗯只鬼崽俚。”