（温馨提示：看的时候一定要用都昌话默读哦。）
(读懂了都是乡亲)
细毛屋里离镇上谬几远，尽管其今年已经满得一十三，屋里个爷娘看得细佬重，总不叫其做么得事，碰到学里不上课，细毛不喜欢在屋场上戏得，喜欢到镇上去捡东西卖钱买么得吃。到得礼拜六，屋场上的崽俚差不多都到得镇上，捡得到就捡，捡不到就偷。细毛到镇上有时得是跟屋场上大大细细个男崽俚女崽俚大帮小伙得同去，有个时得只是其一个人。
里日得学里放得假，细毛早晨吃得粥一下都冒等，就出门去邀别家同到镇上去，大爷屋里细爷屋里，隔壁爹得前头嘎嘎屋里都去得，谬人，走得半边屋场，一样大个崽俚人毛得都冒看到一只，其就只好一个人走。
出得门还冒走几脚路，就看到寡嘴老倌在前头也是一个人。寡嘴比细毛小两岁，在崽俚底头说起话来总是鬼话三天，管么得事都三十三天说里也晓得嗯也晓得，死喜欢摆脸，吃一点点亏得又不敢扯横纹，就死一把皮来湿皮臭缠。寡嘴，拖吧，射子几只鬼东西在屋场上总是做慫人得，摆螯硬，不过其几个都有些得怕细毛，细毛人好性不好，喜欢发鼓，在屋场上大号鼓屎子，撩得细毛发火个人一般都谬好果子吃。
寡嘴在前头卵摆卵摆，细毛在后头趱劲走，谬一下下得细毛就赶上得寡嘴。细毛打算今朝捡东西跟寡嘴打伙得。细毛喜欢两个人在一块捡东西，人多得分起钱来分不到两角，一个人捡东西又谬么味道不好戏得。
“寡嘴，看到其一帮人么？”细毛问。
“呃，细毛，嗯郎个里个晏再来哩，其一帮人只怕粥都冒吃就到镇上去得，一只都冒看到，表得到哪里去得。”寡嘴说。
看到细毛来得，寡嘴心里蜜钵得，晓得细毛肯定要寻人打伙得，细毛力又大，眼钟又尖，手脚又快，捡起东西来最在行，随便哪个，只要是跟细毛打伙得，嫑么做事分个块把两块钱是拿稳得。
“寡嘴，俺两个人今朝打伙得不？”细毛说。细毛对跟自己一块打伙得个人要求不是太高。
也表得是哪里学来个，寡嘴不管做么事都想占别人个赢门得。寡嘴晓得，跟细毛打伙得捡东西好处是大，可是细毛跟打伙得个人分钱不是二一添作五，而是东西哪个捡得哪个就得大头得，冒捡个人就得细头得。寡嘴想，今朝细毛寻不到别人打伙得而只能寻其，还有就是细毛捡东西喜欢跟人打伙得，不喜欢一个人，所以，寡嘴想在答应打伙得之前跟细毛讲正，卖个钱要两个人对半分。于是寡嘴说：“今朝哇，今朝不么愿意捡得东西，捡东西今朝可能晏得，其一帮人几晨去得个，等俺两个去，好难捡到。我最看不懂有个人捡得两块钱就显大得，显得抱鸡婆扬旗得，不晓得自己个辫巴得在哪里。我是到镇上卖滂头得，等下得到堰里去钓鱼。”
“嗯怕去得早个就肯捡得到呗？上昼俺两个捡东西，下昼俺两个去钓鱼。嗨，滂头得还要买，我拿大蒜芤得跟你做一下。”细毛完全不晓得寡嘴的心思得。
“大蒜芤得做个滂头得不好，买个滂头得好看，鱼吃没吃钩一看就晓得。上一回一只蛮大个鲩鱼咬得我个钩，就是因为用了大蒜芤得做处滂头得，过得好多时才看到，拉起来晏得，鱼跑得，有几斤重嘞。”寡嘴说了一大堆理由。
“买滂头得就买滂头得，等下得捡东西个时得反正也到到社上去，俺两个人打伙得就算说好得。”细毛说。
里是寡嘴冒想到个，寡嘴还是不能里样个答应细毛，又说：“下昼钓鱼谬上昼钓鱼好，下昼钓不到鱼，上昼钓鱼好。”
寡嘴肚里一心想郎个让细毛求其打伙得，好得能提出让细毛答应对半分钱个事，一下都冒警觉前头路上有一只水潭，也冒警觉后头来得一部车。嗯只开车个司机也是只短命鬼得，看到路上有水潭路侧边有人，径妈车开快，车砣舞起来个水跟泥巴灒得寡嘴一身，短裤得绷得都是洇湿个，泥巴搭壁，还有好多个屑衣得也沾在上头，寡嘴然个成得一只乌屎子。
“嗯屋里倒绝，嗯屋里死爷，开车几九几，娘膣眼东西。开车，开嗯屋里人，开嗯个祖宗三代，开嗯到背口岭上去，倒绝个东西，死爷个河佬，下次撞到你只老子，不栽破嗯只玻璃你只老子就不是人。嗯前世造得恶，里世谬好报，另世也谬好报，另另世都还是倒绝。……”细毛望着车屁股骂。想到能跟细毛打一番伙得个机会就里样个谬得，寡嘴肚里又是起火又是濞曹个。
“哈哈哈哈，寡嘴，还买滂头得啵，买鬼哟，赶快到屋里换绷的换裤喔。”细毛丢下寡嘴，一个人往镇上走。
按照大人的个说法，里一日的细毛个日子有些得不干净。
细毛到得镇上，就去寻东西捡。东寻西寻走到一只位境，看到前头有硬壳纸，正要去捡，就听到打爆竹，难怪是嗯得死得人。细毛听到有人说：“嗯去打课书早些得来，大爹得等到日子好安派人到亲戚屋里把信。”细毛怕死人，有再多个东西也不想捡，跑得。
又走到一只位境，细毛听到有两只女卵得搞经降祸，降得雾气昂天。一只女卵得说：“嗯只不要脸个东西！白面！洋面粉！青皮梨得！秋白茄得！不晓得丑卖几多钱一斤，四到里困人，七屋八社个男卵得都等你困净得。里样个，你还不如在三叉路口搭茅棚得啥，又赚钱又止痒。”继只女卵得说：“我是白面，洋面粉，嗯好，嗯螯硬，嗯又好看又中用，看你乖乖样子得，项多也是菩萨胩里个卵，神棍得。我困得七屋八社，嗯九世外国个男卵得都喜欢咧。怕我不晓得吧，做女崽俚个时得就跟男卵得疯疯石石，还冒拜堂就攀筲箕吃冷饭。还跟鸡毛换灯草个人跑过，现世报个东西，说在三叉路口搭棚，我还是跟人，嗯要做就是去跟外头个狗扯欠啥，五六只，七八只狗都结到嗯侬，有野狗，疯狗，恶狗。”
又走到一只位境，老远八远看到一只做娘个站得堂庼在骂崽，骂得口里馋得哺。化生子，焦苗个，讨债个，舞神扮鬼，扮神扮鬼，朝一丝夕一丝，妈我一只好好得个钟拆成得一抱铁，打八败。骂了一大泻。
转得好几只位境，细毛个么得都冒捡到。细毛上镇捡东西总冒打过塌皮，其有些得不甘心，转啦转，转到镇侧边个野坂里，在一棵苦楝子树兜下坐。坐得谬几多时，其的眼钟就发现跟头的土巴底头有一块瓦片很特殊，像是一块瓦片，又像是一只碗，就是只露得一点点沿出来，赢下来个都埋得土巴底头。
细毛寻到一根棍拨得，在瓦片得侧边雕雕厾厾，瓦片得现得越过越大，到后还真是一只碗，一只花碗，一点都冒破，合然个，是细毛总冒看到过个花碗，花布统董画得许多个东西，就是看上去有些得不正，挢膣捩胩个牌子得。细毛听别人说过古董瓷器个事，心里好欢喜，估计自己是挖到得一只宝，肯定能卖好多钱。
(提示，后面还有喔）
[此贴子已经被作者于2009-8-22 11:24:51编辑过]
赣公网安备 36042802000101号