两亲家比卵 [复制链接]

     茶壶老倌到女仂屋里吃昼饭，喝得一肚个冷水。过后好几日，细香都在屋里搭家搭事，对公爹得铜壶硬谬一只好面子，说话谬一声好气，铜壶要是叫其做个么得，细香眉毛都可杀得人死。铜壶想想自己上番确实不应该，嗯个牌子做对茶壶有些得过位，就打梗介么时得还只礼，当真请茶壶过来吃餐把正得个昼饭，讨新妇得欢喜。
    为里餐昼饭，铜壶老倌动得个心思得。昼饭肯定不能简级得，随便舞两只南瓜辣椒肯定不行，舞两只鸡子煎煎架个韭菜得打只汤也不行，一定要舍高。一是为讨新妇得欢喜，二也是舞得舍高茶壶老倌下番就不好意思来得。亲家老倌也不是孬银，晓得那里长期有嗯个多好东西打发也，要舍高当然容易，斫肉打酒，猪肝炒腰花，嗯都要钱，铜壶舍不得。铜壶要是大方人，上番得也谬只腌萝卜糁酒个事。

（说明：因为提示有禁用词，但事实上又没有那个词，所示分段发。）

左想右想，铜壶老倌想到得一样茶，泥鳅钻豆腐。泥鳅田沟里有，一斤豆腐嫑几多钱。听崽俚说，泥鳅钻豆腐还是街上馆子里个好菜哩。泥鳅现今也不多，现个人，狗卵狗逼都舞里吃，田里化肥农药也闹得地里谬泥鳅。不过，铜壶老倌晓得，猪婆垅里塘岸下只沟里有泥鳅。里日得，铜壶拗把锄头去猪婆垅里望水，寻只掐颈箩带得跟头。到得塘岸下，在田沟里作两条坝，两只手合在一块，翘起屁股在田沟里戽水。戽干得水一看，铜壶老倌呢都笑欠得，沟里一沟螺蛳，硬有几十只，只只蛮大个。（错）（难怪是里只字）得个老拐，螺蛳肉得和粉不又是一只好菜！一边在泥巴里头翻泥鳅，一边捡螺蛳。
铜壶老倌计划舞只泥鳅钻豆腐，又多只螺蛳肉得和粉，在田沟里翻泥巴其硬是屁股眼里都有劲。翻啦翻，哇喳，又翻得一条勒壮个黄鳝出来。黄鳝跑起来快，铜壶老倌一下冒捉住，又钻到泥巴里头去得，铜壶趱劲往前翻，又翻得出来，又冒捉住，又翻得出来，总算捉到得。铜壶把黄鳝卡在手里看，估计少不了半斤，架个辣椒得炒炒有勒实一碗，嘶笑个：“娘膣眼！表子个崽！嗯跑，跑到天上去！再跑也是明朝到我肚里去变屎！”然后把黄鳝丢到掐颈箩里，寻把禾秆扭只粑塞紧掐颈箩。

又多得一只好菜。铜壶老倌不愿再翻了。碗把泥鳅得有了，更要紧个是怕黄鳝钻跑得。拿锄头把田沟舞还得原，拎只掐颈箩去塘口里洗手。捉里只黄鳝硬把其身上面上舞得泥巴菩萨。
也真是鬼吃饼个事，铜壶老倌又碰到得好事，一只野鸡伏在塘岸下只芭茅蓬里抱妊。其放下掐颈箩，拿着锄轻手细脚得过去，然后一锄头往野鸡身上扫过去，冒照戒到锄头举高得些得，兜得一根树桠，野鸡听到动静，扑如飞得起来，铜壶再举锄头打过去，迟得，野鸡飞跑得。“嗨呀，既个又多一只好菜！里还不是一般得个好菜。”到野鸡窝里，铜壶看到六只野鸡子，摸摸泡滚个。表得里关长鸡么？拿一只在石头上磕一下，看到里头长得血筋。算得罢，卬得五只野鸡子在窝里。
回过头一看，要死，掐颈箩都翻得地上，黄鳝也钻得出来。幸好是草上，铜壶赶紧把黄鳝捉到掐颈箩里。想想恰刚个事：哎，人心不足蛇吞象。有三样也菜就够得。
到得屋，铜壶老倌寻只缸，养得黄鳝跟泥鳅，又拿块面盆养得螺蛳，嘶笑个对新妇说：“细香啊，过两日叫亲家来吃餐昼饭啥！今朝亨时，舞得个泥鳅得，就是螺蛳还要养两日，干净些。”
看到又是黄鳝又是泥鳅又是蛳，公爹得还说叫老子来吃昼饭，细香换得只人样个，眉毛都笑上得树：“爹爹，郎个舞得许多哩！”
“嗨，今朝是不亨时。也是亲家没口福。猪婆垅里塘岸下一只野鸡婆在嗯得抱妊，要不是树桠兜得锄头，就等我打死得。”
“有野鸡子没？”
“有七只。我打破得一只，长得血筋，冒要。”
当日得，细香就搭得信到屋里去，说铜壶请茶壶过来吃昼饭。
听说亲家老倌搭信来，茶壶老倌心里蜜钵得，第二日得就打算过去。老妈头在屋里骂：“嗯又不作丑！嗯又不晓得丑卖几多钱一斤！上回你去吃个腌萝卜糁冷水，里回还死一把皮来去。叫我，丑得落虱，戴鬼脸壳得见人！”茶壶说：“人家好心好意叫俺吃餐昼饭，总不能不给别人面子啥。上回腌萝卜糁冷水又不是我一个人喝得，亲家老倌也是一样个。”老妈头说：“你去！你去！老一把年纪，还馋得跟崽俚得样个，表得几世冒吃过别人个昼饭。”茶壶说：“也是，我过两天再去！省得别人说叫我跟引狗样个，是吧！”
过得两日，茶壶老倌兴纵个去吃昼饭。
辣椒炒黄鳝、泥鳅煮豆腐、螺蛳肉和粉，还有两样园里长个菜。铜壶老倌还老早拎得一揭啤酒过来。铜壶老倌说：哎呀，谬么得茶，就是靴亲家过来坐坐。茶壶老倌说：亲家你硬是里个加敬个。里还叫谬么得菜，怕是街上馆子店里都谬里个好茶。铜壶老倌说：亲家嗯今朝要好生得喝两瓶。茶壶说：有里个好菜，当真要喝两瓶。
开得酒，铜壶心里说，舍一己就想把茶壶扮下醉去。反正也冒花只卵钱，就是一揭啤酒。一个两瓶喝得，三瓶喝得。茶壶就说要屙尿。铜壶也有些得尿涨，看茶壶先要屙尿，就说：“亲家啦，今天俺两个人，把里一揭酒都喝的，中间往里不屙尿，试试看不？”铜壶不晓得，茶壶有只本事，就是会急尿。要屙得紧，都可急得好多时。茶壶就说：“试试看啥。总冒喝过许多，就是表得醉不？”其实茶壶可喝得酒，要是能屙尿，喝一揭啤酒都只有七八分得。
喝得许多酒，不管是好菜歹菜都顾不上吃，两个人嗯一端我一端光喝酒。也喝得好多时，细香都吃完得饭歇昼告去得。酒喝完得，铜壶说茶壶喝醉得，茶壶说铜壶喝多得。两个人都打硬争说自己冒醉。铜壶就是：“亲家啦，嗯要是醉得就服输，就歇下得再走，要说冒醉我就陪你走。”茶壶说：“走就走，怕个卵。我一点都冒醉，就是担心嗯侬可走得啵？”
出得屋场，茶壶又要屙尿，铜壶也等尿涨得肚里痛，却还是不等茶壶屙尿。茶壶说，不屙就不屙。又走得几脚路，铜壶等涨得走不动，就说：亲家啦，要么里样个，俺两个人比屙尿。反正现是当天大昼，路上也谬人。俺两个人边走边屙，看哪个屙得远。茶壶说：好啥，俺两个人并排走，往哪个屙尿先歇。两个人都是尿涨死得，又多喝得两口，不管许多，都掏出二老倌，边走边撒尿。还嗯说我尿不大，我说嗯中间歇得。
虽说路上人少，也还是有。有只大号寡嘴个认得茶壶跟铜壶两个人，看到其两个人里个样子，开头还表得是么事，走近得看清楚得，笑得肚扭筋：“喂呀，嗯两个人，当真是两亲家比卵。”
寡嘴只嘴跟广播筒样个，冒过几多时得，团近四周个人都晓得，茶壶跟铜壶两亲家比卵。

为什么正宗都昌人表示要看完很费劲

ivy123123:为什么正宗都昌人表示要看完很费劲 (2014-08-21 17:21) 

大概是因为有好多字平常只说不写吧。

真心没看懂！你搞这么多文字不累么？

应该发音频，而不是文字！

应该把泥鳅改为辣鳅

要读书并快乐着

泥鳅改成  辣溜不是更合适