三叔公年轻个时也是只响边，么事都喜欢赶时毛。屋里田坂地里冒有事个时个，伊侬就跟别家到南昌去帮工，95年个时得12块钱一日。一个月也可以赚到三四百块钱。
有一日得天落雨。工棚里个银都跑到街上去戏得。三叔公也闲得冒事，想到街上去剃头。三叔公带得六块钱，跟一大代将军一样，从八一广场巡到得老福山，最后看到一只店位置也比较好，而且上头写得理发5角钱一次。三叔金就大马金马往理头个转椅得上一坐，操着并不标准普通话说：“老座，我要剃头！”店老板赶紧跑过来闷：“老座，你是光剃头？还是要洗头，刮胡子、吹风、打摩丝啊？”三叔公里只银是死爱面子活受罪，总是怕别家说伊侬是乡巴佬，所以就赶紧说都要都要。老板听后就开始为伊服务。等到头也洗好得，胡子也刮得，也吹得一只大奔头，喷上得个摩丝得后，三叔公也神清气爽。整个像个下到乡下检查工作个乡长一样个。
到结账个时得，三叔公问老板几多钱得？老板说一共五块钱！吓得三叔公差一些得搭到凳底下去得。赶紧问老板，你不是写得剃头五角钱嘛？说个得要五块钱啊？嗯侬不是杀猪嘛？老板闷三叔公：“我郎个杀嗯侬个猪罗？五角钱是理光头巴得，你又是洗头、又是刮胡子，又是打摩丝、又是吹风，水表钱？电表钱？房租表钱？我说你一只乡巴佬还想扮乡长～冒有钱就莫好里只高！你不拿钱莫想走出我只门，打罗汉还打到我只头上来得！”
三叔公说：“我不是打罗得个，我是一只正派个作田地个银，今朝我是瞎得眼，等嗯侬斗得，钱我还是付得起！”
三叔公好不情愿从口袋里拿出五块钱，给了老板（本来里五块钱是三叔公准备到一只小
饭店里炒只菜再喝点烧酒个时得用个，里餐酒等里只杀猪个老板拿得去。看样子中午又只好恰馒头喝开水了。该死个东西，打个摩丝得要里多个钱，还武得头上个头发跟猪踪一样个硬！像只么得撒。老三你真是只孬包！还打摩丝……三叔公向着卖馒头个摊得走去！！
[ 此帖被绝对马甲在2013-01-08 08:26重新编辑 ]
赣公网安备 36042802000101号