跟荷香得两个人等得一老薄，也冒看到班车来。蛮大个日头晒，寡嘴怕蛇皮袋里个清明粑晒馊得，心里毛焦火辣，骂：“里个倒街个班车，死哪里去得没，到现都冒看到只影巴得。”
“寡嘴，寡嘴。”寡嘴听到有人喂其，一看，是细时得一块读书个伙计得响边。
响边穿一身西装，胳公下头夹一只细细皮包得，皮鞋刷得凌霞个，头上梳得搭光个，卵摆卵摆，老远八远走得过来。
响边个日子真好过，屋里个爷娘刊得五只姐姐，出得嫁都往娘屋里贴钱，就其一只崽，看得别样重。爷娘做死做命，种得两石多田地，还跟别人打短工得，一年要舞两三万，全都拿得响边用。响边是爷卵不是肉做个，拿爷娘个钱在外头开公司，听说好个时得也赚过两转钱，赚转钱换只老婆以，老婆都换得三只，表得现么式。
“喂死，喂魂，老远八远就哇叫个，别人表得我是寡嘴呗。哇，响边，你扮得跟菩萨胩里个卵样个，神棍得。头上苍蝇得歇上去都要跌死哈。”寡嘴跟响边不客气。
“等班车到县里去？”
“哪个跟嗯样个，有专车。”
“嗯只车卖得，准备买过一部好个，手续都办好得个，今朝到九江去开来。”
“靴我。响边，你打部的啥，让我也跟到嗯亨一番时啥。”
“好啥，先拐只弯送嗯到县里。”正说话，响边只手机响得，其只彩铃是“响边，来电话了。响边，来电话了。”
“哇，响边，电话都响得谬边。”
响边对电话里“哇哇哇”说得一老薄，还是普通话，好像还是只女崽俚打来个。谬几多时，响边说：“哎呀，寡嘴，真不凑巧，公司里有事，秘书打得电话来，不能送嗯到县里去，下番哈，下番，等我只新车来了，你随时打电话，我做你只专车司机。”
“不听嗯逗。要就是里番，下番不算。”
“里番真不行，下番一定行。”
“嗯就算得。”寡嘴本来想在荷香得跟头摆一下脸，冒想到打得塌皮。再说，一心顾跟响边说话，把荷香得一个人架得一边，怕其发气，赶紧凑得荷香得跟头。
响边也凑得过来：“寡嘴，里是嗯只老婆。排场，排场。”
里个话寡嘴听得蜜欢喜。
“寡嘴，嗯走桃花运，里个排场个老婆，亨时，亨时。”响边又说。说个时得，两只眼钟在荷香得身上扫来扫去，特别是荷香得扪口，赫高个，又天热冒穿几多衣裳，响边个眼钟像是钉得上头抹都抹不下来。
荷香得面光红个，转得一边去。
“弟新妇得，你号么得个？”响边看荷香得转得身，凑得过去，还伸只鸭婆颈，从荷香得颈下往堆头看。
响边当自己个面里样个看自己个老婆，寡嘴起得老火：“响边，嗯里只孱头屎，做么得没，冒看到过排场女人得吧。”
“寡嘴，表发火，俺是兄弟，老话得说，兄弟如手足，老婆如衣裳。表为只女人得跟兄弟发气。”
“兄弟，兄嗯上山，兄嗯到土里去，一只里个现世个活宝。嗯也表得几很好样个，表得自己是几大个老板，还不是拿你只爷娘做死做命舞来个血汗钱在外来吸吸响响，也是爷娘前世造得恶，刊得一只里个搭头。抱死婆扬旗得，显大得。……”
寡嘴还要骂，班车来得。看到荷香得上得车，寡嘴趱劲跟得上去。
赣公网安备 36042802000101号