[小说]中秋节咯作兴：烧窑得 [复制链接]

【都昌县北山区域方言版】
　　　　我细咯时(音:shen)得，细家得喜欢望(音:mang)过年过节，老话说得好，“细家得望过年，大人(音:nin)得忙赚(音:can)钱。”因为过年过节除得可(音:kei)吃(音:qia)到许多平时吃不到的东西，还可(音:kei)放心咯耍得。过年跟端午时得好耍得咯事都是大人家得去参与个，比如划龙船跟抬灯笼。只有中秋节，是可由细家得自己来操办这个节日的活动的，因为我嗯那得的中秋节祖祖辈辈有只作兴：烧窑得。
　　　　中秋节咯夜里烧窑得是我嗯那得中秋节的一定要有咯事，里只窑得就是由细家得自己结个一种由砖头得跟瓦片得在一快像火炉样个东西。圆个，上头瘦下头宽，满身是洞眼得，并且“品”字型分布，跟塔样个。最大(音:lai)咯位置是窑脚，直径一米巴得，高度一米多些得，里(音:di)头放容易着(音:cho)咯树丫得，跟烧砖咯窑样个。中秋节嗯日(音:ni)得夜间，月(音:nie)光起山咯时得，窑里头咯树丫得烧起来，烧得窑得满身通红咯时得，再浇上煤油，很好耍得。
　　　　中秋节当日(音:ni)得，吃(音:ya)过昼饭，要是不是星期六得跟星期天得，还要照常上学，不过都是打只朝神就回来得，老师都晓得今朝过节细家得有事要忙，都会(音:wei)老早放学。细家得都是一点都不敢耽误，一路小跑往(音:mang)屋里跑。回来得后，也不要人喊(音:we)，大家就会聚到一块为夜间咯事开始安排。烧窑得咯准备工作通常分成三组，第一组除得负责捡砖头得跟瓦片得，还要结窑。第二组去峦里捡丫得跟死树.第三组负责到煤油。安排事不需要特别安排，都是根据往年咯经验一下就可(音:kei)定下来咯，还可根据细家得自己咯特点找到自己喜欢做咯事，比如力气大咯就去搬柴搬丫，瘦弱咯的就去挨家挨户到煤油，反正是都有事做。
　　　　捡砖头得也不是一件容易咯事，嗯样咯时(音:shen)得比不得今朝，么得东西都有里咯多个，嗯样咯时得要是啦里有块砖头得也会被人捡走，架在嗯得，要是今后建个猪圈(音:chou)、圈墙么得就可(音:kei)用得。里咯时得，在屋前屋后转得大半日，结果一样都冇捡到。冇办法就想歪招，就是去掀人家圈墙上咯压砖，要是被大人家得捉到得，因为是过节，只是说你一帮人拿得几块就可(音:kei)得，不会跟平时一样挨一顿臭骂。
　　　　砖头得捡得差不多就开始结窑得，窑得咯位置不要选，年年样个，在屋场咯前头，一块空地上，怕发火，侧(音:za)边冇树跟禾秆堆。开始先在地上挖一只直径八十公分左右咯潭(音:luan)，深二十公分左右就可(音:kei)得，在潭咯四周先码上几块大咯土砖做地基，再在土砖上一层一层咯结砖头得，边结边缩，等到结到八十公分高咯时得，再在砖头得上结瓦片得，一层层得架，一净(音:jiang)到窑上头咯口子只有三十公分左右，窑高一米上下就可(音:kei)得。结窑得还是要靠技术，传统咯烧砖瓦咯窑是四周密封不透气，而细家得耍得咯窑要到处是洞眼得，不许用泥巴糊,还要保证窑不倒。
　　　　窑结好得后，其它两组咯工作也做得差不多，煤油瓶得只只装得喷满咯，树丫得也堆得一大堆。断(音:luan)夜前，窑得里头咯柴先要放正，硬柴架在上头枞毛丝得架在下头，夜间来得直接点火就可(音:kei)。
　　　　中秋节咯夜饭比平时要好好多，鱼肉都有，但里咯时得细家得都没有心吃饭，随便扒得几口得就跑得。
　　　　夜间七点来钟得，围在窑得跟咯人就慢慢的多得起来。月(音:nie)光刚刚起山，只要结窑得咯点着一根火柴往(音:mang)窑里头一丢，烧窑得咯活动就算正式开始了。最先着(音:cho)得咯下头咯枞毛丝得，慢慢得就着到窑里每只角落，其它硬柴不管粗细很快跟到着(音:cho)起来。不要几分钟窑里头就跟太白金星的炼丹炉样个,红彤彤咯。里咯时得有人用根长棍伸(音:chen)到窑里头撺(音:zuan)两下，火星得就从窑身上咯洞眼得里往外头射，窑得一下就跟流光宝塔样个，非常壮观！一下下得，窑得咯砖跟瓦烧得跟打铁咯炉里烧红得咯铁样个，变得通红咯，远看窑得像只红灯笼，真咯好看。窑得烧得通红咯时得，往窑得咯身上泼煤油最好耍得，胆大咯细家得往前一走，一瓶油一下就倒到了通红咯窑上，只听到“轰”的一声响，吓得倒油个赶紧后退。好一个火上浇油，油助火势，就跟跑得起来一条火龙样个，跳一得光得跟日(音:nin)间样个，舞得看热闹咯人喝叫咯。就跟里样个好耍得咯高潮里一夜要有三四次。等柴烧了得，油也冇咯时得，时间已经花得两个钟头，里咯时得，月(音:nie)光已经好高，大人家得开始慢慢得都走得，细家得好像还冒耍过瘾，在快要熄火咯窑跟议论着开头好耍得。

恩格多个银看烧窑嘚，几好戏嘚哦。嗯摘火苗嘚着的恩个哼高个，嗯一邦银也好卫士呃，我细咯时嘚也喜欢烧窑的，长大的就冒烧过，挠音嗯弄哈，酿鹅回味的一哈。

泪中鱼:听说过,冇看到烧过,快失传了.
好象还拉半边磨石跑着玩. (2013-01-07 21:36) 

拉磨得...，童年的记忆！

雪夜彭城:不错。是件很好的作品。跟《都昌姆妈的花篮子》有一比。 (2013-01-11 10:51) 

谢谢老师高抬！

不错。是件很好的作品。跟《都昌姆妈的花篮子》有一比。

看楼主的用心良苦及细心，很是敬佩。

都是俄个老师啊！写得里个好个！

细哥的莽过年，代银的莽作田。

梦里鄱湖:
此种习俗我们这里没有！
写得很有意思，笔法很细腻。欣赏了！

谢谢段老师哦！
家乡话写东西花我九牛二虎之力。

此种习俗我们这里没有！
写得很有意思，笔法很细腻。欣赏了！