腌萝卜糁酒 [复制链接]

茶壶叔公嘴馋，碰到落雨个天就想到女仂屋里吃餐昼饭。也难怪，在屋里吃饭，餐餐是瓠得炒南瓜，不就是豆结得炒茄得，吃得口里一点味都谬。

茶壶叔公也有位子走，其刊得五只女仂，细女仂前年出得嫁，五只女仂都分得家，只只女仂看得爷重，茶壶叔公去得都好加敬。

又落得个细细雨得，做不得事，走人家正合适，茶壶叔公早晨吃得粥，就跟老妈头说得一声：今朝到女仂屋里吃餐昼饭来。

茶壶叔公一走，就走得细女仂屋里。前十拉日得落雨，也是到细女仂屋里吃昼饭。犟个茶壶叔公准备去二老倌屋里，也表得是郎个扮法得，一走就走得细女仂屋里。

还冒进屋场，茶壶叔公就等细郎个爷铜壶叔公看到得。铜壶叔公看到茶壶叔公肚里就冒火，生怕其抹崽屋里吃完得。崽跟新妇都听话，都死做活不吃，掐死掐命，想聚钱做屋，一只里个嫑脸个亲家老倌，三打两日就跑来吃昼饭。

茶壶叔公看进门，铜壶叔公也来得。铜壶叔公就说：哎呀，亲家老倌呐，稀客嘎，稀客嘎，是么事风抹嗯吹得来咧。

茶壶叔公前十拉日得到过，听到亲家老倌里样个说，彤红个面说：女崽俚看分家，屋里老妈头叫我过来看看。

铜壶叔公说：要喔要喔，自己个女仂屋里不走，还有哪里走没。今朝我也谬么事，陪亲家老倌吃餐昼饭。

铜壶叔公是不等新妇得弄好茶到茶壶叔公吃。

茶壶叔公只细女仂看到里个阵势，表得郎个扮好。拉开房里个屉得，底头只盈得一只鸭婆子，赶赶沙沙到隔壁借得几只鸡子来。又戴顶斗笠去割得个韭菜得来。打算两只老倌一个煮一只，盈得个拿韭茶碰碗汤淘饭。

铜壶看到新妇得借得鸡子来，还是四五只，心里跟割肉一个痛，眉毛都皱拢得。

茶壶叔公晓得亲家老倌个心事得，就想整亲家老倌一反，正走急得口渴，就到灶下拿只端桶，在水缸里舀得两碗水，端到堂庼说，亲家，喝个茶得。

铜壶心里想，表子崽，今朝抹你用冷水灌死去。就趱劲邀茶壶喝水。喝完得一碗，铜壶让身到灶下打得两碗水来。

铜壶想茶壶喝冷水，茶壶也想铜壶喝冷水，两个人开始还作个狗屎礼得，到后来跟喝醉得酒样个，你一碗我一碗，都是一口干。

两只几十岁个老倌，又是落雨个凉天，承当里样个喝水啵。还好，两只老倌身体都好，冒喝成郎个样子。

到差不多煮昼饭个时得，茶壶得细女就到房里拿豆粑得，准备煮点心。茶壶说，女仂，表煮个么得哈。我跟亲家两个都喝饱得，吃不下去。

听到茶壶说，铜壶心里蜜钵得，接到说，表煮么得，表煮么得，现急肚里毕饱个，个么得都吃不下去。

让茶壶喝得一肚个冷水，铜壶心里多少有些不过意，就说，亲家啦，我屋还有个过年个酒得，是好酒，好酽，俺两个人喝个得不。

茶壶当真也吃不得么得下去，肚里说，表子崽个亲家，你屋里个酒，是正经个嬷嬷坛里个酒，不喝也谬。

喝酒总要舞个么得糁糁，铜壶怕新妇得又要弄么事菜，干脆从屋来带得一碗腌萝卜。

两个人都喝多得水，吃个咸萝卜糁酒，硬表得几有味道。有别人过来看，说茶壶只女：嗯真小气，两只爹爹喝酒，素菜也不弄个得。

茶壶跟铜壶齐崭崭得说：哎呀，嗯是表得，腌萝卜糁酒，世上少有，表得几好。

据别家说个笑话，添油加醋舞得一只贴，为方言活动作点贡献。

我坐个硬板凳。写到了牌子。
几个参考字：
既样个，本意是过去那种，后喻为那种。
嫑，不要的合音。
让身，即一让身的功夫，一转身的功夫。
承当，承受，其中承在都昌方言中念sheng。

个别词语还是读不莫顺，但总体感觉写得太具都昌风情了。

两只老倌的心理活动，尤其是“钻字头”等细节描摹的淋漓。

坏水，好酒好菜，好味道。

坐下来再细细品味

细时的，屋里经济贫乏，揶个萝卜鼓的，既早上恰粥恰，恰饭也当菜糁。

此文读着品着都象鱼皮花生的韵味!

其一:味美精彩!都昌话很地头,好多都是经典个词.

其二:篇幅不算短,内涵略显单薄.

都昌话么？看不太懂

坐下来再细细品味  

正宗都昌话。俩个老人家刻画得惟妙惟肖，不错哦。